Фрижидер

Одамна сакам да почнам да пишувам асоцијации. Секако пензионирањето ми даде простор за тоа. Денес решив конечно да започнам со пишувањето и првата асоцијација да ја споделам со вас.
Случки од секојдневното живеење, некако со возраста ме асоцираат на духовното живеење и ме тераат да ги поврзувам едни со други.
Оваа асоцијација ја нареков фрижидер.

Честопати сопругот ми замера дека ги префаќам и преместувам работите во фрижидерот од едно место на друго. Еве и денес откако се вративме од пазар, самата се фатив во таа моја активност и нормално си ја оправдав својата постапка.
Е, како сега да ја оставам големата здела за сирење кога го изедовме повеќе од половина и остана сосем малку сирење, а зделата ми одзема простор во фрижидерот. Го преместив во помала здела и си отворив простор за нешто друго. И дињата речиси сме ја изеле ,уште едно парче останало, а се уште стои во голема здела. Ајде и последното парче диња во помала здела. Оп, и тука ми се отвори простор. Еееее, кесата со краставици од минатиот пат уште си стои подиспразнета во фјоката, а краставиците сега веќе повеќе од половина изедени , си се подрашириле, си се раскомотиле во фјоката, им го зафатиле местото и на праските, па само навидум за нив нема место. И краставиците ги спастрив и им ги донесов праските во комшилук.

И така безброј други преместувања и прередувања во фрижидерот, во истиот простор ми овозможуваат да си направам место за нови нешта.

Е така дојдов до мојата асоцијација на фрижидерот со моето тело, мојот ум, моите емоции.

Од секогаш сум сакала промени и во просторот во кој живеам и во моите сознавања на нештата и во учењата на нови нешта. Постојат луѓе кои едноставно не сакаат промени, убаво им е едаш ставено и оставено. Но моето тело, мојот ум, моите емоции и фрижидерот едноставно не можат да функционираат така и затоа си имаат голема поврзаност меѓу себе.

Денес сум научила нешто, го користам тоа одреден период во животот, па согледувам дека излегле други работи кои уште подобро функционираат од досега наученото. Го тргам досега наученото и му отстапувам место на новото, подобро сознание. И во мојот ум се случува истото. Постоеле наметнати мисли, наметнати навики, наметнати сфаќања, но кога ќе ја освестам вистината за нив, почнувам да ги прередувам, исто како што правам со фрижидерот, некои дури сосема ги исфрлам од мене. Почнувам да се запрашувам, оваа наметната мисла или навика, дали ми користи или пак само слепо си ја следам?? Моите емоции , од каде ми се?? морам ли да ги држам постојано истите во мене ?? ми користат ли или ме трошат ??? Кога ќе си освестам дека сум заглавена во непотребни навики, мисли, емиции, почнувам со чистка. Ги тргам старите и им отстапувам место на нови, кои во моментот мислам дека се подобри за моето постоење.

И така постојано, како што го прередувам фрижидерот на секое пазарење, си буричкам и во моите мисли, во моите емоции, во моите постапки и постојано реди – пререди во истото тело, во истиот но пререден ум. Си го средувам хаосот во себе. Тоа не значи дека еднаш средено така и ќе остане, но научив до следното средување , да уживам во средениот фрижидер, во средените емоции, се додека не дојде време за нови прередувања, во мислите, во навиките, во емоциите, во фрижидерот.

Научив да не се нервирам кога ќе дојде новиот хаос, туку да ги засукам ракавите и да почнам со прередување и создавање на простор за прием на новата ситуација, од која секако ќе извлечам нови сознанија, па во следниот период ќе уживам во нив.

И да не се правам важна, дека секогаш беше така. Со тоа мое реди – пререди , постепено станав свесна дека треба да уживам во тој процес, а не како некогаш да се нервирам заради тоа.

Ееее – живот – фрижидер.
Автор на текстот: Сузана Петреска
***
Сузана Петреска е учесник на 21 дневниот јога предизвик кој започна на 14 Август и трае до 3 Септември, каде што го објави овој свој пост.
И благодариме бескрајно, што го сподели овој нејзина увид со нас, нејзината инспирација е и наша инспирација! Се надеваме дека нејзините постови, текстови и белешки со кои не опсипува. ќе завршат еден ден во нејзина книга.