Присутно срце – Јога активен одмор во Крушево, Октомври 2022
Во кинеската азбука, буквата која го означува зборот свесност се преведува како “Присутно срце” и токму тоа е зборот што го додавам како зачин на моите јога ритрити.
Присутно срце вклучува во себе квалитет на топлина, отвореност, нежност и прифаќање.
И групата тоа го докажа и одбрани. Со цело срце!
Овој пат групата беше интернационална. Имавме учесници од Австралија, Англија, Швајцарија и се разбира Македонија. Па ги однесовме и до Стоби и до Прилеп и манастирот Архангел Михаил.
Часовите и сесиите течеа една по друга, а учесниците беа присутни со цело срце на нив.
Имавме јога сесии, јога нидра, вежбавме со стап, но исто така имавме и безборј игри низ Крушево кои смеа и радости ни дарија, заедно со и по некое запаление на мускули 😊.
Во дневните активности решававме задачи и планинаревме. Баравме занаетчии, стари заборавени обичаи, стари куќи и многу споменици. Учествувавме дури и во правење ајвар и ракија.
Плус, како шлаг на денот беше посетата на стара Крушевска куќа, на тетка Норка и чичко Тошо, кои ни ги отворија вратите на нивниот скромен дом и не примија во него. Може да се каже дека ја “размрдавме” енергијата во куќата, бидејќи сегде влеговме и се што имаа домашно подготвено пробавме.
Сите се потсетивме дека секогаш кога сме во допир со добрината на луѓето околу нас, го цениме животот и убавината околу нас многу повеќе.
Па во името на сите учесници можам да ви кажам дека “Среќна сум што сум пресреќна” за ова искуство 😊
A за овој јога ретрит, кажаа:
“Најголем впечаток ми остави Биби при пешачењето до Мечкин Камен кога истото го направи медитативно преку техниките за молчење и обрнување внимание на звуците околу нас и боите. Да не не’ стави во таков ред, ќе си дрндавме меѓусебно со што ќе ја трошевме енергијата несвесни за природата околу нас. Мене лично, тоа ме потсети и на ” техниките” од Кастанеда- пешачење со затворени дланки, за да не се троши енергија, коешто го практикував секогаш во такви прилики.”“Си поминав одлично, најмногу ми остави впечаток прошетката во тишина, работилницата со тајни предмети и работилницата со извонредноста”
До наредниот активен одмор, бидете здрави и среќни.
Билјана Пешева
Ако имате време дојдете и на Есенскиот предизвик кој почнува на 14 Октомври – петок. Повеќе за тоа ,тука кликни 😉
