Wellness Afterwork & Релациските потреби: Науката и магијата на поврзувањето

Во последниот период интернетот е преплавен од видеа и фотографии на малото мајмунче Pinch од Јапонија – преслатко суштество кое брзо го освои вниманието на целиот свет.

Но, она што навистина го прави Pinch посебен не е само неговиот изглед, туку начинот на кој се врза за негувателите: постојано бара контакт, допир, нежност и сигурност. Иако изгледа како интернет-атракција, Pinch е потсетник на нешто многу подлабоко дека поврзувањето е клучниот биолошки и психолошки механизам за развој – кај сите живи суштества.

Пинч не „бара внимание“ – тоа бара конекција. Истото важи и за децата. Истото важи и за возрасните. Потребата за поврзаност не исчезнува со возраста – само ја менува формата. Од детското поврзување до возрасните љубовни релации. Во детството, врзувањето со родителите создава основа за доверба, сигурност и чувство на вредност. Кај возрасните, овие развојни механизми не исчезнуваат – тие само се изразуваат преку релациски потреби.

Според психологот Ричард Ерскин, релациските потреби претставуваат фундаментални психолошки потреби кои овозможуваат здрав развој, внатрешна стабилност и автентичност. Тие се појавуваат во сите релации: партнерски, професионални, пријателски, па дури и во процесот на личен раст и развој. Но, пред да ги разгледаме релациските потреби, важно е да разбереме уште една силна сила во човековиот развој…

Промената како предизвик: зошто е толку тешко да се расте?

Според Ерскин, процесот на посакувана промена често е непријатен бидејќи: ја напуштаме „својата природна средина“ – старите навики и воспоставените релации -ризикуваме да го изгубиме чувството за континуитет и ја нарушуваме психолошката хомеостаза – или внатрешната рамнотежа, која пак ги предизвикува нашите “сценариски” верувања и референтни рамки.

Како човечки суштества, ние копнееме по предвидливост. Дури и кога старите навики не ни служат, тие ни се познати – а познатото дава чувство на безбедност.

Од другата страна Ерик Берн – таткото на трансакциска анализа зборува за феноменот Physis во релациите , кој го претставува внатрешниот нагон кај човекот кој го води кон раст, здравје, автентичност и благосостојба. Фриц Перлс тоа го нарекува „возбуда и раст на човековата личност“, а Света Катерина од Сиена го опишува со силните зборови: „Бидете тоа што Бог го замислил за вас, и ќе го запалите светот.“

Токму помеѓу овие два пола – стравот од промена и Physis – се одвива личниот раст и развој.

Релациските потреби според Ерскин се основа на здрави релации и личен развој

Ерскин ги развива релациските потреби како продолжение на детските развојни потреби и ги поврзува со универзалните механизми за емоционално здравје.

Тие се:

Потреба за безбедност Да можеме да бидеме тоа што сме – без осуда. Релацијата е сигурна кога нашата ранливост е заштитена, разбрана и почитувана.
Потреба за признавање и афирмирање Да бидеме видени, препознаени и прифатени не поради тоа што правиме – туку поради тоа што сме.
Потреба за стабилна и доверлива друга личност Некој врз кого можеме да се потпреме – ментор, партнер, родител, терапевт.
Потреба за заемно искуство Да бидеме со некој што „знае како е“ и има слично искуство. Оттука и силата на групите за поддршка.
Потреба за себедефинирање Да ја изразиме и зачуваме сопствената уникатност – без страв од казна или осуда.
Потреба да влијаеме Да знаеме дека она што го правиме, чувствуваме или кажуваме има значење и ефект врз другиот.
Потреба другиот да иницира контакт Релациите треба да бидат двонасочни. Кога само едната страна иницира, врската станува болна.
Потреба да се изрази љубов Да покажеме љубов – и таа да биде примена, препознаена и ценета.

Овие потреби постојат кај сите возрасни – без разлика на возраст, професија или животна приказна. Тие не се луксуз, туку предуслов за здрав психолошки развој.

Кога ги задоволуваме овие потреби – растеме. Кога не ги задоволуваме – се затвораме или се бориме.

И тука доаѓаме до прашањето: Каде денес возрасните можат да градат здрави релации, да се поврзат и да го поддржат личниот раст?

WELLNESS AFTERWORK –

беше поврзување, одмор и развој во едно

Токму на оваа тема неодамна се реализираше уште едно успешно Wellness Afterwork дружење во „Литература“ во East Gate Mall, каде со огромно задоволство заедно создадовме топла, поддржувачка и инспиративна атмосфера. Настанот го водеа

Бојана Петровска – „Мој психолог“
Билјана Пешева – “Хелти Лајф Скилс”

и како специјален гостин на панел дискусијата го имавме

Даниел Трбогазов – „Мој тренер“

Разговаравме за релациските потреби, за тоа како се гради личен баланс, за предизвиците на промената и за тоа што значи да бидеме добро – во тело, ум и релации.

Најголемата порака беше токму оваа: Човекот расте во релација. Човекот заздравува во релација. Човекот се менува во релација.

Како Pinch кој ја бара својата сигурност – така и ние, без разлика на возраста, ја бараме нашата. …

Потребата за поврзаност не исчезнува со возраста.Таа само ја менува формата.

Наместо да бараме рака како дете, бараме:

партнер кој ќе нè разбере
пријател кој ќе нè слушне
ментор кој ќе нè поддржи
терапевт кој ќе нè види

Иако сме возрасни, во суштина и понатаму сме суштества кои растат преку релација.

Настанот беше поддржан од нашите долгогодишни пријатели Vitamins MK, кои за учесниците подготвија специјални подароци – витамини и спирулина, како дополнителна грижа за нивното здравје и благосостојба. 🌿