Патот на ослободување од емоциите: Впечатоци од промоцијата на книгата „Водич за ослободување од тага“ во Битола

На 25 април 2025 година, во топлата атмосфера на Младинскиот Културен Центар – Битола, со огромна радост ја одржавме промоцијата на мојата книга
„Водич за ослободување од тага – Холистички алатки за враќање на животната хармонија“.

Над 50 жени се собраа заедно со нас да го отворат срцето и да влезат во темата која сите нè допира – емоциите што ги носиме во себе, понекогаш свесно, понекогаш тивко и сокриено.

Настанот беше збогатен со панел-дискусија на која учествував јас, како авторка на книгата, заедно со мојата почитувана колешка Оливера Вељковиќ – јога инструктор со три децении искуство, наставник и истражувач на длабочините на човековата природа.

Ослободување од потиснати емоции – зошто е толку важно?

Луиза Хеј вели:

“Ако не сме подготвени да ги ослободиме емоциите, тие ќе се населат во нашето тело и ќе почнат да зборуваат преку болка.“

Потиснатите емоции не исчезнуваат. Тие се складираат длабоко во нашите ткива, мускули и клетки. Со текот на времето, тие создаваат внатрешен притисок кој може да се манифестира како стрес, анксиозност, замор, тага, па дури и како хронични здравствени состојби.

На нашата панел дискусија зборувавме отворено за тоа како телото и душата бараат простор за ослободување. Кога му даваме глас на она што сме го потиснале, кога му даваме дозвола да биде видено и прифатено, започнува процесот на вистинско исцелување.

---

Книгата „Водич за ослободување од тага“ – Прирачник за нов почеток

Оваа книга не е само за оние кои минуваат низ загуба или длабока тага.
„Водич за ослободување од тага“ е создаденa како поддршка за секој кој сака да се врати кон себе, да ги ослободи тежините што не му служат повеќе и да создаде повеќе простор во себе за радост, мир и љубов.

Во книгата споделувам практични алатки:

• медитативни процеси,

• вежби за телесна свесност,

• енергетски техники,

• рефлективни прашања,

• и лични увидувања за патот на исцелување.

Книгата нуди чекори кои може да ги примените сами, со почитување на сопственото темпо, во вашето безбедно внатрешно пространство.

---

Благодарност од срце

Овој настан беше за мене повеќе од промоција на книга – беше споделување на патот што лично го поминав и што сè уште го поминувам.
Битола, градот на моето детство, уште еднаш ми покажа дека топлината, љубовта и искреноста се чувствуваат најдлабоко токму кога ги споделуваме заедно.

Благодарна сум на секоја жена што беше таму, што слушна, што сподели, што се осмели да погледне во себе со љубов и храброст.

Патот на ослободување започнува со еден мал чекор – со дозвола да почувствуваме.
И секој чекор води кон повеќе живот, повеќе љубов, повеќе нас.

Љубов и светлина 
Билјана Пешева