Патување Кон Внатрешна Слобода: Јога Ретрит во Крушево

Оваа есен, ја имавме привилегијата да одиме на јога активен одмор  и ја доживееме магијата на Крушево – ретрит кој траеше четири дена, исполнети со мир, поврзување и нови искуства. Крушево, со својата есенска убавина, стана наша инспирација за внатрешна трансформација, опуштање и заеднички моменти што ќе ги паметиме долго.

Секој ден започнуваше и завршуваше со јога – утрински и вечерни сесии кои нè потсетуваа на важноста на присутноста и грижата за себе. Но, времето за поврзување продолжуваше и после вечерата, кога се впуштавме во разговори, игри и саморефлексија. Тие моменти на длабоки разговори беа можност за нас да се запознаеме себеси и едни со други на сосема нов начин.

Имавме и социјални игри и тим билдинг активности низ улиците на Крушево. За два часа ги истражувавме улиците, решавајќи задачи кои нè вклучија сите. Иако уморот го почувствуваа сите, задоволството на крајот беше огромно – на некој начин, сите бевме победници. Крушево со своите полни улици и есенска убавина ни понуди нешто уникатно: паднатите лисја, сончевите зраци и шаренилото на природата станаа наша метафора за промени, баш како што ние се менувавме низ тие четири дена.

Воздухот, планините и магијата на есента нè потсетија на тоа колку е важно да  запреме и да уживаме во секој момент. Заокружувајќи го ретритот, ја посетивме спомен куќата на Никола Мартиновски и се потсетивме на наследството што нашите предци ни го оставиле.

Да се биде во Крушево на 11 Октомври значи да се биде дел од нешто поголемо –  да се биде дел од македонскиот непокор и гордост. Ова патување остави траен белег на сите и  си заминавме со обновена енергија, љубов и благодарност.

До следната авантура и новите моменти на поврзување! 🙏💖 Биби Пешева